عدم شرب اللبن للحامل لا يسبب اى مخاطر للجنين ( بدائل اللبن )

حامل و مش طايقة اللبن متشربيهوش ولا يهمك و ماتخفيش 

تعالى واريا

انا هقول تجربتى بكل صراحة مع اللبن و الحمل

 انا زى اى واحدة حامل مكنتش بطيق اللبن ولا ريحة و لا طعم و مش اول ثلاثة شهور بس لاة طول الحمل مش طايقة اشوفه حتى يا ناس

طول الحمل مش بشرب لبن و كانت النتيجة 

عادى ما شاء الله ابنى زى الفل طلع الاسنان ست شهور و نصف بالضبط 

 مشى سنة بالضبط  ولا تقوس ولا ضعف ولا اى حاجة الحمد لله 

و انا بردو كويسة الحمد لله زى الفل

اقولكم عملت ايه

مش هقولك الكالسيوم اللى بيديه الدكتور ده البديل لانه مش كفاية

بصى يا ستى

اول 3 شهور ماجبرتش نفسى على حاجة ابدا لانها كانت اصعب شهور بالنسبة ليا شوية الميا تخلينى ارجع فكنت باكل بقسماط كتير و بسكوت مملح و حتى كوباية الماية كنت برجعها

المهم عدوا اول 3 شهور و فتحت فى الاكل كنت مفجوعة بس اجى على اللبن و مش اطيق اشربه

و كل اللى حواليه بيانبونى و يقولولى هتندمى لو شفتى ابنك فى حاجة بعد الشر عليه

طب اعمل ايه

اولا

واظبت على الادوية خاصة الفيتامينات كنت باخد ماترنا و كالسيترون تمام

ثانيا

وجبه الفطار

كنت بافطر 3 مرات تقريبا ههههههههه

كنت لازم اكل 2 بيض مسلوق حاف على الصبح ( طبعا البيض مفيد جدا و فيه كالسيوم و بروتين )

كوباية زبادى – رز باللبن – ام على ( كل ديه بدائل للبن )

جبنة كيرى ( غنية بالكالسيوم ) – جبنة فيتا – جبنة بريذيدون كوباية – جبنة قريش ( مليانة كالسيوم)

 لو ملاحظين مكتوب على الكوباية انها بمقام 8 كوبيات لبن يعنى لو اكلتى نصفها فى اليوم كأنك شربتى 4 كوبيات

وجبة الغدا

مش عايزة اكلم كنت باكل كتير جدا

كنت مركز على بدائل اللبن

كنت بحب المكرونة بالبشاميل و البشاميل مليان لبن كنت اعمل كتير علشان اعوض اللبن اللى مش بشربه 

و كذاك الجلاش بالجبن المشكلة 

و اعدت ادور على الاكلات اللى فيها كالسيوم كتير علشان اركز عليها

تخيلوا اغلبية الاكل اللى بنحبه فى كالسيوم

بامية – الفاصوليا البيضاء - الفلفل الرومى – الخص – البرتقال – الكيوى – البروكلى – الزيتون – السمسم - اللفت

و احنا مركزين على كوباية اللبن اللى مش قادرين نشربها 

ديه بعض الحاجات اللى مليانة بالكالسيوم

 

ثالثا

نيجى لاهم وجبة هى وجبة العشا

و ديه اهم وجبة ليه لان الكالسيوم اكتر وقت بيتركز فيه هو وقت النوم

بتعشى جبن بيض اى حاجة

و كباية زبادى او رز باللبن او ام على 

و الافضل عصير لبن بالجوافة افيد 100 مرة من اللبن لوحده ليه

لان الجوافة بتحتوى على فيتامين c  و الفيتامين ده بيثبت اى فيتامينات فى الجسم

كذلك عصير البرتقال مفيد جدا فيه كالسيوم و فيتامين c 

الكوكتيل بين الكالسيوم و الفيتامين c بيبقى افيد من الكالسيوم لوحدة

قبل لما انهى موضوعى انا مش بقلل من فايدة اللبن بس بجد انا طول الحمل مش قادرة اشربه و مش عايزة ضميرى يأنبنى على ابنى اللى ممكن يحصله حاجة بسببى و حاسة بكل واحدة قرفانة من اللبن و بتيجى على نفسها علشان طفلها علشان كدة عملت الموضوع ده يكون فيه بدائل للبن

لكن اللى قادرة تشرب لبن و لو 1 % لازم تشربى و تعملى اللى عليكى 

و بكدة اكون انتهيت موضوعى و يا رب يقوم كل واحدة حامل بالسلامة